Saturday, October 17, 2015

നാട്ടുപൂക്കൾ


മുക്കുറ്റി
ഗൂഗിൾ ചിത്രം


കുഞ്ഞുതെങ്ങെന്ന പോൽ നീളെ മുക്കുറ്റികൾ 
തിങ്ങും തൊടികൾക്കിതെന്തു ചന്തം!
സംയുക്ത പത്രങ്ങൾ വൃത്തമൊത്തങ്ങനെ 
ഭൂമി മേൽ  പച്ചക്കുട കണക്കെ 

അക്കുടയ്ക്കുള്ളിൽ നിന്നെത്തി നോക്കീടുന്നു 
കുഞ്ഞുമഞ്ഞപ്പൂക്കളിമ്പമോടെ 
ശാലീന ഗ്രാമീണ ദേവത തന്നുടെ 
നാസിക തന്നിൽ മൂക്കുത്തി പോലെ!

നില വിട്ടു പൊങ്ങിടാത്തെങ്ങു പോലുള്ളതി-
നാൽ 'നിലംതെങ്ങെ'ന്നുമുണ്ടൊരു പേർ 
ഔഷധപൂരിത പുഷ്പദശങ്ങളി-
ലൊന്നിവളഞ്ചിതൾ പൂവുള്ളവൾ 

ഇദ്ദശ പുഷ്പമണിഞ്ഞു തരുണിക-
ളുല്ലസിക്കും തിരുവാതിര നാൾ 
കർക്കിടക പ്പഞ്ഞമാസത്തിലും മുടി-
ച്ചാർത്തിലായ് ചൂടുമൈശ്വര്യത്തിനായ്  

ചിങ്ങത്തിൽ മാബലിത്തമ്പുരാനെയെതി-
രേൽക്കുവാൻ മുന്നിൽ ചിരിച്ചു നിൽക്കും
കേരള മണ്ണിൻറെ യോമനയായവൾ 
മാമാലനാടിൻ തനിമയിവൾ 

താഴ്മയോടെന്നുമീ ഭൂമിയിൽ ചേർന്നു നി-
ന്നീടുന്ന മുക്കുറ്റിയെത്ര ധന്യ!  
ആയുസ്സിവൾക്കൊരു വർഷം തികച്ചുമി-
ല്ലെങ്കിലുമാദരവുറ്റ  ജന്മം!

4 comments:

  1. മുക്കുറ്റിയെ തെങ്ങിനോട് ഉപമിക്കാം അല്ലേ. തെങ്ങിന്റെ മിനിയേച്ചര്‍ തന്നെയാണല്ലോ കാഴ്ചയില്‍

    ReplyDelete
  2. നന്നായിട്ടുണ്ട് കവിത
    ആശംസകള്‍ ടീച്ചര്‍

    ReplyDelete
  3. നിലംതെങ്ങെന്ന് മുക്കൂറ്റിക്ക് പേരുണ്ടായിരുന്നോ???

    നന്നായിരിക്കുന്നു...

    ReplyDelete
  4. കവിത കൊള്ളാം.

    ReplyDelete