ഒരു ജാതിയൊരുമതമൊരു ദൈവമെന്നുള്ള
വേദമൊന്നേ കാതിലോതീ സദാ ഗുരു,
ജാതിയെച്ചൊല്ലികലഹിച്ചിടാതതിൻ
ധർമ്മമനുഷ്ഠിക്കുവാൻ ചൊന്നു ശ്രീഗുരു;
എങ്കിലോ നമ്മൾ ഗുരുദേവനെയൊരു
ജാതിതൻ ദൈവമാക്കിച്ചുരുക്കിയോർ!
മദ്യം വിഷമതുണ്ടാക്കരു,താരും
കുടിക്കരു,താർക്കും കൊടുക്കരുതെന്നു-
മെന്നെന്നും പ്രബോധനംചെയ്ത ഗുരുവിനെ
ദൈവമായ്ക്കാണ്മവർക്കിന്നു നേതാവൊരു
മദ്യവ്യാപാരിയായ്ത്തീർന്നതും വിപ്ലവം!
പൊള്ളയായുള്ളോരു വിപ്ലവങ്ങൾ പല
മാരീചവേഷങ്ങളിൽ വന്നുപോകവേ-
യെല്ലാം നിരീക്ഷിച്ചിരിക്കുന്നു സദ്ഗുരു,-
വെല്ലാം സദയം പൊറുക്കേണമെൻ ഗുരോ!
