മുക്കുറ്റി - (നാട്ടുപൂക്കൾ)

മുക്കുറ്റി

ഗൂഗിൾ ചിത്രം

കുഞ്ഞുതെങ്ങെന്ന പോൽ നീളെ മുക്കുറ്റികൾ 

തിങ്ങും തൊടികൾക്കിതെന്തു ചന്തം!

സംയുക്തപത്രങ്ങൾ വൃത്തമൊത്തങ്ങനെ 

ഭൂമിമേൽ  പച്ചക്കുടകണക്കേ 

അക്കുടയ്ക്കുള്ളിൽനിന്നെത്തി നോക്കീടുന്നു 

കുഞ്ഞുമഞ്ഞപ്പൂക്കളിമ്പമോടെ 

ശാലീനഗ്രാമീണദേവത തന്നുടെ 

നാസികതന്നിൽ മൂക്കുത്തി പോലെ!

നിലവിട്ടുപൊങ്ങിടാത്തെങ്ങു പോലുള്ളതി-

നാൽ 'നിലംതെങ്ങെ'ന്നുമുണ്ടൊരു പേർ 

ഔഷധപൂരിതപുഷ്പദശങ്ങളി-

ലൊന്നിവളഞ്ചിതൾപ്പൂവുള്ളവള്‍ 

ഇദ്ദശപുഷ്പമണിഞ്ഞു തരുണിക-

ളുല്ലസിക്കും തിരുവാതിരനാൾ 

കർക്കിടകപ്പഞ്ഞമാസത്തിലും മുടി-

ച്ചാർത്തിലായ് ചൂടുമൈശ്വര്യത്തിനായ്  

ചിങ്ങത്തിൽ മാബലിത്തമ്പുരാനെയെതി-

രേൽക്കുവാൻ മുന്നിൽച്ചിരിച്ചുനിൽക്കും

കേരളമണ്ണിന്‍റെയോമനയായവൾ 

മാമാലനാടിൻ തനിമയിവൾ 

താഴ്മയോടെന്നുമീ ഭൂമിയിൽ ചേർന്നുനി-

ന്നീടുന്ന മുക്കുറ്റിയെത്ര ധന്യ!  

ആയുസ്സിവൾക്കൊരു വർഷം തികച്ചുമി-

ല്ലെങ്കിലുമാദരവുറ്റ  ജന്മം!