Friday, December 7, 2012

വാക്ക്

വാക്കെന്ന വാക്കിന്റെ
യാഴമറിയണം
വായ്‌ വിടും വാക്കിനെ
സൂക്ഷിച്ചു കൊള്ളണം

ഒരുവാക്കിലെന്തിത്ര
ചൊല്ലുവാനെന്നല്ല
വാക്കിലാണെല്ലാം
വാക്കാണ്‌ സര്‍വവും

പറയുന്ന നേരത്ത്
ചെറുതെന്ന് തോന്നിടും
ചില നേരം വാക്കുകള്‍
മല പോലെ നിന്നിടും!

വാക്കുകള്‍ കൊണ്ടൊരു
യുദ്ധം പിറന്നിടാം
വാക്കുകള്‍ തന്നെ
സമാധാനമായിടാം

കനിവിന്റെ വാക്കുകള്‍
വിനയത്തിന്‍ വാക്കുകള്‍
അറിവിന്റെ വാക്കുകള്‍
പൊരുളുളള വാക്കുകള്‍

പകയുളള വാക്കുകള്‍
പരിഹാസ വാക്കുകള്‍
മുനയുള്ള വാക്കുകള്‍
വിനയാകും വാക്കുകള്‍

വാക്കുകള്‍ ചെന്ന്
തറയ്ക്കുന്ന ദിക്കുകള്‍
ചുടുനിണം വാര്‍ന്നു
തളര്‍ന്നു ചുവന്നിടാം

വായ്‌ വിട്ട വാക്കുകള്‍
വാള്‍ത്തലപ്പായിടും
വാഴ് വിൻറെ  നേര്‍ക്കതു 
വാളോങ്ങി നിന്നിടും

പലതുണ്ട് വാക്കുകള്‍
മറയുള്ള വാക്കുകള്‍
അമൃതെന്ന് തോന്നിടും
വിഷമുള്ള വാക്കുകള്‍

വാക്കിന്റെയുണ്മ
തിരിച്ചറി ഞ്ഞീടണം
വാക്കില്‍ പതുങ്ങും
ചതിയുമറിയണം

വാക്ക് പാലിക്കുവാന്‍
ധൈര്യമുണ്ടാകണം
വാക്ക് പിഴയ്ക്കാതെ-
യോര്‍ത്തു നടക്കണം

ഒരു വാക്കില്‍ * നിന്നുല്‍ -
ഭവിച്ചോരു ബ്രഹ്മവും
വാക്കാല്‍ നശിച്ചിടാ -
മശ്രദ്ധമാവുകില്‍

വാക്കുകള്‍ക്കുള്ളില്‍
വെളിച്ചം നിറയ്ക്കണം
ഇരുള്‍ നീക്കി വാക്കിന്‍
തിരി തെളിച്ചീടണം .

***************

('ഓം'  എന്ന വാക്കിൽ നിന്ന് പ്രപഞ്ചം ഉത്ഭവിച്ചു എന്ന് ഹൈന്ദവ വിശ്വാസം )

5 comments:

  1. Excellent stream of thought. How the one who listens catches the essence of what was uttered is the crux of the scenario. Words could offend, pacify, antagonise, soothe and also could make us cry, fight and even kill.
    ഭാരത യുദ്ധത്തില്‍ , ഗുരുവായ ദ്രോണരെ വീഴ്ത്താന്‍ പാണ്ഡവര്‍ തേടിയത് വാക്കിന്റെ സഹായം, ജെര്‍മ്മന്‍ ജനതയുടെ അന്നത്തെ വീര പുരുഷന്‍ ആയി Hitler ഉയര്‍ന്നത് സ്വന്തം വാക്ചാതുര്യത്താല്‍ , Shakespeare ഉം ചങ്ങമ്പുഴയും ഇന്നും ഒരിമ്മിക്കപ്പെടുന്നത് അവര്‍ എഴുതി വച്ച വാക്കുകളുടെ പേരില്‍

    തൊടുത്തു വിട്ട അസ്ത്രവും കൈവിട്ട വാക്കും ഒരിക്കലും തിരിച്ചുവരില്ല....

    ReplyDelete
  2. കവിതയെക്കുറിച്ചൊരു വാക്ക്


    ......... മനോഹരം ...........

    ReplyDelete
  3. അര്‍ത്ഥം നിറഞ്ഞതും,മനോഹരവുമായ വരികള്‍,....
    ആശംസകള്‍

    ReplyDelete
  4. പ്രിയപ്പെട്ട ടീച്ചര്‍,
    വളരെ സത്യമായ വാക്കുകള്‍ മനോഹരമായി താളത്തില്‍ എഴുതിയ ഈ കവിത വായിക്കുന്നവരുടെ മനസ്സില്‍ എന്നും അണയാതെയിരിക്കട്ടെ ഒരു വെളിച്ചമായി. ഏവരുടെയും എന്റെയും നാവുകളില്‍ എപ്പോഴും മധുരകരമായ വാക്കുകള്‍ മാത്രം പിറക്കട്ടെ. ഏവരുടെയും സന്തോഷത്തിനു കാരണമാകട്ടെ.അഭിനന്ദനങ്ങള്‍ അറിയിക്കുന്നു.

    സ്നേഹത്തോടെ,
    ഗിരീഷ്‌

    ReplyDelete
  5. നല്ല വാക്കുകള്‍ക്ക് എല്ലാവരോടും ഒരു നന്ദിവാക്ക് ..

    ReplyDelete