Tuesday, June 24, 2014

ഹർഷാമൃതം

വര - ഗിരിജ നവനീത് 


നിൻ തിരുനടയിൽ നിൽക്കുമ്പോൾ  
തൊഴുകൈ കൂപ്പി വണങ്ങുമ്പോൾ 
എന്തേയിങ്ങനെ ഭഗവാനേയെൻ
മിഴികൾ രണ്ടും നിറയുന്നു?!

അഴലിൻ നിഴലുകളുള്ളത്തിൽ 
നിൻ കൃപയാലിന്നില്ലൊട്ടും, 
പിന്നെയുമെന്തെൻ മിഴിനീരാൽ 
മറയുന്നിതു തവ മുഖപദ്മം?


പല നാൾ കൂടി കണ്ടിട്ടോ? നിൻ  
പരിഭവ വചനം കേട്ടിട്ടോ?
ഓടക്കുഴൽ വിളി നാദത്തിൽ 
വിരഹത്തിൻ ശ്രുതി ചേർന്നിട്ടോ?

എഴുതിരി തീർക്കും കതിരൊളി തൻ 
തീഷ്ണതയാൽ മുറിവേറ്റിട്ടോ ?
കഴലിണ കഴുകിയ തീർത്ഥത്താലെൻ 
കണ്ണിൻ പീലി നനഞ്ഞിട്ടോ?

കർപ്പൂരത്തിൻ  ധൂപച്ചുരുളെൻ 
കണ്‍കളെരിക്കുന്നതിനാലോ ?
ഹരിനാമത്താൽ മുഖരിതമെന്നുടെ 
ചിത്തം  വിങ്ങുന്നതിനാലോ ?

ശിരസ്സു നമിക്കും പൊൻ പടി മേൽ   
നിൻ പാദം കണ്ടതിനാലോ !
നടയിലെ മണ്ണിൻ തരി കണ്ണിൽ 
പുണ്യം പോൽ പെട്ടതിനാലോ?

നിൻ മേഘച്ചുരുൾ മുടിയിൽ നി- 
ന്നെൻ മിഴിയിൽ മഴ പെയ്തിട്ടോ? 
നിറുകിൽ പീലികളാടുമ്പോൾ 
*ജരനെയ്തോരമ്പോർത്തിട്ടോ?

എരകപ്പുൽ മുനയാലങ്ങെൻ 
ദർപ്പമൊടിക്കുന്നതിനാലോ?  
അണ മുറിയാതൊഴുകുന്നുണ്ടെൻ 
മിഴിയും മനവും ഒരുപോലെ !

കലരും ഭക്തിക്കടലിൻ നിൻ 
കരുണാമയമാം തിരുരൂപം 
അവതാരപ്പൊരുളുൾക്കൊള്ളാൻ 
കഴിയാഞ്ഞെൻ മിഴി കവിയുന്നു !!

*(യാദവകുലത്തിന്റെ അന്ത്യത്തിൽ ജരൻ  എന്ന വേടൻ ആണ് ശ്രീകൃഷ്ണനെ മാനായോ മയിലായോ തെറ്റിദ്ധരിച്ച് അമ്പെയ്തത് എന്ന് പുരാണങ്ങളിൽ പറയുന്നു.)






11 comments:

  1. ഭക്തിപ്രഹര്‍ഷത്തില്‍ നിന്നൊരു കവിത

    ReplyDelete
  2. ഭക്തിനിര്‍ഭരമായ വരികള്‍
    ആശംസകള്‍

    ReplyDelete
  3. നന്നായിരിക്കുന്നു കവിത
    ആശംസകള്‍

    ReplyDelete
  4. ഭക്തി സാന്ദ്രം ,,,,,,,,,,,,

    ReplyDelete
  5. നല്ല വരികൾ ടീച്ചർ..
    ആശംസകൾ !

    ReplyDelete
  6. Rhythm of the poem is exciting. ...congrats

    ReplyDelete
    Replies
    1. Thank you very much. Happy to hear that still some people like poems with rythm and tune.

      Delete