ദക്ഷിണായനം എന്നാൽ സൂര്യൻറെ തെക്ക് ദിശയിലേക്കുള്ള യാത്ര. സൂര്യൻറെ ഉത്തരായനവും ദക്ഷിണായനവും ഇട മുറിയാതെ സംഭവിച്ചുകൊണ്ടേ ഇരിക്കുന്നു. ജനിച്ചു വീണ നിമിഷം മുതൽ മനുഷ്യനും യാത്രയിലാണ്. നേടി എന്ന അഹങ്കാരവും പോര എന്ന അതൃപ്തിയുമായി, മോഹിപ്പിക്കുന്ന മായാമരീചികയ്ക്കു പിന്നാലെ മനുഷ്യൻറെ തെക്കോട്ടുള്ള യാത്ര. മായയിൽ നിന്ന് പരമ സത്യത്തിലേയ്ക്ക്... മരണമെന്ന പരമ സത്യമാകുന്ന മരുപ്പച്ചയിലേയ്ക്ക്...A Journey From Mirage To Oasis...
ഭീഭത്സരൂപിയാം നാരായണാ
നാരസിംഹാകൃതേ ദീനബന്ധോ!
ധർമ്മനാശം തടുക്കും നരന്മാർ -
ക്കെന്നും തുണയ്ക്കായണഞ്ഞിടേണം,
തൂണും തൃണവുമോരോ തുരുമ്പും
നീയെന്നു കണ്ടു ഭജിച്ചിടുന്നേൻ,
കാണുന്നവർക്കുള്ളിലൊക്കെയും നിൻ
കാരുണ്യമെന്നു നിനച്ചിടുന്നേൻ,
ഞാനാകുമിത്തരികോശത്തിലും
നാരായണാ നിൻ തുടിപ്പു മാത്രം!
ധർമ്മസംരക്ഷകോത്കൃഷ്ട, മുഗ്രം,
നിത്യം സ്മരിപ്പു നിൻ ദിവ്യരൂപം!!
നാരായണാ നമോ നാരായണാ,
മായാനൃസിംഹായ നാരായണാ
#നരസിംഹജയന്തി#
ഈ ഡിജിറ്റൽയുഗത്തിൽ കരതലാമലകം പോലെ നമ്മുടെയെല്ലാം ഉള്ളംകയ്യിലിരിക്കുകയാണ് ശങ്കരാചാര്യവിരചിതങ്ങളായ അദ്വൈതദർശനങ്ങൾ. എന്നിരുന്നാലും ഈശ്വനിയോഗവും ഇച്ഛാശക്തിയും ഉള്ളവർക്കുമാത്രമേ ഉള്ളംകൈ തുറന്ന് അതിലൊന്നെടുത്തു രുചിച്ചുനോക്കണമെന്നുപോലും തോന്നുകയുള്ളൂ. ഈ കലികാലസഞ്ചയഹൃദയത്തില്‍ ആ അമൃതു രുചിക്കുവാനുള്ള ആഗ്രഹം നാൾക്കുനാൾ വളരട്ടെ!
അഖിലാണ്ഡത്തിലുറഞ്ഞീടും
അദ്വൈതപ്പൊരുളിപ്പാരിൽ
കനകാമലകപ്പെരുമഴപോൽ
പെയ്യിച്ചാന്ധ്യമകറ്റീടാൻ
പിറവിയെടുത്തൂ കാലടിയിൽ
പരിപാവനമാം പെരിയാറിൻ
തീരത്തുള്ളൊരു ഭവനത്തിൽ
ആര്യാംബാവിൻ സുതനായി
ശിവഗുരു തന്നുടെ മകനായി
സാക്ഷാൽ ശിവനുടെ വരമായി
വന്നുപിറന്നൊരു ശങ്കരനേ,
നിന്നുടെ കാലടി പിന്തുടരാൻ
കാലാകാലങ്ങൾതോറും
ജന്മംകൊള്ളുന്നീ മണ്ണിൽ
ലക്ഷം ലക്ഷം ശിഷ്യന്മാർ
സദ് സനാതനധർമ്മത്തിൻ
ബ്രഹ്മാനന്ദകുടീരത്തിൽ.
ജയജയ ശങ്കരശങ്കരനേ!
ശങ്കരനുള്ളിലുണർന്നവനേ!!
ഇന്നു ശങ്കരജയന്തി...
ഡോ. ഫിലിപ്പോസ് മാർ ക്രിസോസ്റ്റം വലിയ മെത്രാപ്പൊലീത്തയക്ക് ആദരാഞ്ജലി🙏
നെറികെട്ട ലോകത്തി-
ലടിതെറ്റിവീഴാതെ
നൂറ്റാണ്ടുകാലം
നേരിൻ്റെ നിറവിൽ
ജീവിച്ച വൻതണൽ
ചായുന്നിതൊടുവിൽ...
അഭിവന്ദ്യനാകുമീ
യിടയൻ്റെ ചിരിയിന്നു
നിദ്ര പ്രാപിക്കുന്നു
കർത്താവിൽ ശാന്തം 🙏
