മാതൃഭാഷതൻ മാനം കെടുത്തുന്ന
മാനവർക്കിക്കാലം മാന്യതയേറിടും!
മാതൃകർണ്ണങ്ങളില്‍ വീഴാനരുതാതെ
മാമകഭാഷയിന്നാകെ മലീമസം.
തൃക്കരങ്ങളാലാദ്യം ഗുരുവരർ
തൃപ്തിയോടെപ്പകർന്നൊരാ ഭാഷയെ
തൃണവല്‍ഗണിച്ചു ചവിട്ടിമെതിച്ചിടും
തൃഷ്ണയാൽ മർത്ത്യരിന്നെത്രയും നിർദ്ദയം!
ഭാഷയിൽ ശ്രേഷ്ഠമാകും മാതൃഭാഷയെ
ഭാവവിശുദ്ധിയറ്റേറ്റം മലിനമായ്
ഭാഷ്യഭാഷണക്കുപ്പയിൽ വച്ചവർ
ഭാവനാവൈകൃതങ്ങൾ രചിച്ചിടും
ഷഡങ്‌ഗനാം ശിഷ്യനെ വിദ്യയൂട്ടുകിൽ
ഷഡാതതായികൾക്കൊത്തു വരുമവൻ
ഷഡ് വൈരികൾക്കടിപ്പെട്ടുപോകും പ്രജ
ഷഡീതികൾക്കും നിദാനമായ് മാറിടും.
#അന്താരാഷ്ട്രമാതൃഭാഷാദിനം2022
*******************************************************************
പദസഞ്ചയം
ചതുഷ്ടയം - നാലു കൂടിയത് (ഇവിടെ, മാ-തൃ-ഭാ-ഷ എന്നിവ)
മാമകഭാഷ - എന്‍റേതായ ഭാഷ
മലീമസം - ദുഷിച്ചത്
തൃണം - പുല്ല്, നിസ്സാരമായത്
തൃഷ്ണ - രാഗമോഹാദികൾ, അമിതമായ ആഗ്രഹങ്ങൾ
ഭാഷ്യം - വ്യാഖ്യാനം
ഭാഷണം - വാക്ക്, സംസാരം
ഭാഷ്യഭാഷണക്കുപ്പ - ഭാഷണങ്ങളും അവയുടെ വ്യാഖ്യാനങ്ങളുമാകുന്ന കുപ്പ
ഷഡങ്‌ഗൻ - മൂഢൻ, വിവേകമില്ലാത്തവൻ
ഷഡാതതായികൾ - വധശിക്ഷാർഹമായ ആറു തരം ക്രൂരകൃത്യങ്ങൾ ചെയ്യുന്നവർ (അപരൻറെ വീടിനു തീ വയ്ക്കുന്നവൻ, അപരനു വിഷം കൊടുക്കുന്നവൻ, ആയുധവുമേന്തി കൊല്ലാൻ വരുന്നവൻ, അപരൻ്റെ ധനം അപഹരിക്കുന്നവൻ, അപരൻ്റെ പറമ്പു തട്ടിയെടുക്കുന്നവൻ, അപരൻ്റെ ഭാര്യയെ അപഹരിക്കുന്നവൻ എന്നിങ്ങനെ ആറു കൂട്ടർ - വസിഷ്ഠസ്മൃതി 3.19 )
ഷഡ്‌വൈരികൾ - നമ്മുടെ അധഃപതനത്തിനു കാരണമായ കാമം, ക്രോധം, ലോഭം, മോഹം, മദം, മാത്സര്യം എന്നീ അശ്രേയസ്‌ക്കരമായ ആറു മനോവൃത്തികൾ
ഷഡീതികൾ - രാജ്യത്തിനു വരുന്ന ആറുതരം ബാധകൾ - അതിവൃഷ്ടി, അനാവൃഷ്ടി, ശലഭം, എലി, കിളി, അത്യാസന്നാവസ്ഥയിലെ നൃപന്മാർ or അരാജകാവസ്ഥ മൂലമുള്ള വിദേശാക്രമണം എന്നീ ആറു കാരണങ്ങൾ മൂലം ഉണ്ടാകുന്നത്
