ഇന്നു കുചേലദിനം.
ഭൗതികവും ശാരീരികവുമായ ജീർണ്ണതകൾക്കെല്ലാം പരിഹാരം ജീർണ്ണതയില്ലാത്ത ആത്‌മാവിനെ അറിയാൻ ശ്രമിക്കുകവഴി മനസ്സിനെ എല്ലാ ജീർണ്ണതകളിൽനിന്നും അകറ്റിനിർത്തുകയാണെന്ന സന്ദേശമാണ് കുചേലദിനം നൽകുന്നത്.
സുദാമാവ് എന്നാൽ കുചേലനെന്നും സമുദ്രമെന്നും അർത്ഥം.
സുദാമാവ്
നിത്യം മനസ്സാം കുചേലനീ സംസാര-
ജീർണ്ണത മുറ്റുമവൽപ്പൊതിക്കാഴ്ചയും
പേറിപ്പരമാത്മമിത്രമാം ഗോപാല-
പേറിപ്പരമാത്മമിത്രമാം ഗോപാല-
കൃഷ്ണനെത്തേടിപ്പുറപ്പെടുംനേരം
പിമ്പേ വരും വിട്ടുപോകാൻ വിടാതെയ-
ഞ്ചിന്ദ്രിയവാജികൾ, മോഹാനുഗാമികൾ,
"സമ്പന്നനാമാത്മമിത്രമുണ്ടാകിലു-
മെന്തുണ്ടു നേട്ട"മെന്നാരായുവാൻ സദാ.
സംശയം വന്നുഭവിപ്പിച്ചിടുന്നുവെൻ
യാത്ര മുടക്കിക്കുതിക്കും കുതിരകൾ.
വീണ്ടുമീ മായാസമുദ്രത്തിലിങ്ങനെ
നീന്തുമ്പൊഴാത്മനെക്കാണുവാൻ തോന്നിടും.
ചോദിയ്ക്കവേണമിന്നെന്നുടെ ദാരിദ്ര്യ -
മൊക്കെയുമാറ്റി സമ്പന്നനാക്കീടുവാൻ...
കണ്ടാലറിയുമോ? മിണ്ടാൻ തുനിയുമോ?
കണ്ണനെ ഞാൻ കണ്ടതെന്നോ? മറന്നുപോയ്!
അത്യന്തമോഹപ്രലോഭനപീഢക -
ളൊക്കെയും താണ്ടിയിന്നെത്തിയീ ഗോപുരേ!
മാധവായെൻ ഭക്തവത്സലാ, നിന്നെയൊ-
ന്നുള്ളം നിറഞ്ഞിന്നു കാണണമെങ്ങു നീ?
ഓടിയണയുന്നിതാരെൻ സതീർത്ഥ്യനോ,
മിന്നുമീ ദ്വാരക വാഴുമധീശനോ !
ആനന്ദബാഷ്പം തുളുമ്പുന്നു, ശൗരിയാ
നേത്രങ്ങളെൻ നേർക്കുനീട്ടിത്തിരക്കുന്നു,
" എന്തേ വരാനിത്ര വൈകി നീയെന്നോടു
ഗർവ്വിച്ചു പോരാൻ മടിച്ചതോ? ചൊല്ലു നീ..."
ഗർവ്വിച്ചു പോരാൻ മടിച്ചതോ? ചൊല്ലു നീ..."
നെഞ്ചോടു ചേർത്തെന്നെയാരേ പുണർന്നി-
ടുന്നൊന്നുമേ ചൊല്ലുവാനാവാത്തതെന്തഹോ!
ഗദ്ഗദം തൊണ്ടയിൽ വന്നു കുടുങ്ങുന്നു,
ആരിതെൻ പാദങ്ങളയ്യോ! കഴുകുന്നു!
എൻ കയ്യിലെയവൽക്കെട്ടു തുറന്നു നീ-
യോരോ പിടി വാരി വായിലിടുമ്പൊഴു-
മെൻ ബന്ധനത്തിൻ്റെ കെട്ടുകൾ പൊട്ടി
ഞാൻ മുക്തനാകുന്നുവെൻ കൃഷ്ണാ! ഹരേ! ഹരേ!
മായാമുകന്ദ! നീ ജാലങ്ങളീ വിധം
കാട്ടിയെൻ ഹൃത്ത്ക്ഷുദ്രദാരിദ്ര്യമാറ്റി നി-
ന്നോടുള്ള ഭക്തിയാകും സുദാമാവി-
ന്നടിത്തട്ടു പോൽ മനം സമ്പന്നമാക്കണം!
പ്രേയസ്സിൻ പിന്നാലെയോടിത്തളർത്തിടാ-
തേകണം ശ്രേയസ്സിൻ കാന്തിയും ശാന്തിയും !
പദാവലി
സുദാമാവ് - കുചേലൻ, സമുദ്രം
വാജി - കുതിര
മോഹാനുഗാമി - മോഹങ്ങൾക്കു പിമ്പേ പോകുന്നയാൾ
സതീർത്ഥ്യൻ - സഹപാഠി, ആത്മമിത്രം
ഹൃത്ത്ക്ഷുദ്രദാരിദ്ര്യം - ഹൃദയനൈർമ്മല്യത്തിനു ഹാനി വരുത്തുന്ന ചിന്തകൾ
പ്രേയസ്സ് - ഭൗതികതൃഷ്ണ കൊണ്ടു നേടാവുന്ന താൽക്കാലികമായ നേട്ടങ്ങൾ
ശ്രേയസ്സ് - ആത്മീയമായ ജ്ഞാനവും തപസ്സും കൊണ്ടു നേടുന്ന സമഗ്രവും ശാശ്വതമായ ഐശ്വര്യം
