മോക്ഷാടനം

ആലിലക്കണ്ണുകൾ ലാസ്യമാടുന്നുവോ,

പൂത്താലിക്കയ്യുകൾ കൂമ്പുന്നുവോ!

ആലുവാപ്പുഴ തൻ കളാരവമാലില-

ത്തുമ്പുകളേറ്റേറ്റുപാടുന്നുവോ!

ആലിലക്കണ്ണൻറെ മുറ്റത്തു നിന്നെൻറെ 

ആലുവാതേവരെ കാണുംനേരം

ഇരുദേവപാദങ്ങളെപ്പുൽകുമീ പെരി-

യാറിനെയല്ലോ നമിക്കുന്നു ഞാൻ!

ശ്രീഗുരുനാഥനും ശങ്കരനും
പുണ്യപാദങ്ങളർപ്പിച്ച പൂർണ്ണാനദി-

യെൻകൈക്കുടന്നയിൽ കൊള്ളവേയാത്മാവി-
ലാകെ പ്രകാശം പരന്നിടുന്നു!

ദേശാടനം മഹാമോക്ഷാടനം ചെയ്യു-
മീ മുരചീനദി തൊട്ട മണ്ണിൻ

രേണുക്കളെന്നിരു പാദങ്ങൾ മൂടവേ-

യെന്നഘം തീർന്നകം മിന്നുന്നുവോ!

തൊട്ടതെല്ലാം പൊന്നുതന്നെയായ് തീർത്തുകൊ-

ണ്ടീ പുണ്യതീർത്ഥമൊഴുകിടുമ്പോൾ

വറ്റും നദികളെയോർത്തു തപിക്കുമെൻ

വേദനയെല്ലാം മറന്നിടുന്നു!
വേദനയെല്ലാം മറന്നിടുന്നു!

***********************

*മുരചീ നദി - പെരിയാർ