വിഷുക്കതിർ

കണ്ണനാമുണ്ണിക്കിടാവിന്നരയിലെ
കൊഞ്ചിക്കിലുങ്ങുന്ന പൊന്നരഞ്ഞാണം 

കണ്ണഞ്ചിടും മഞ്ഞമുത്തണിക്കൊന്നമേൽ  

ഞാലുന്നു മേടമുറ്റം നിറഞ്ഞങ്ങനെ!

മഞ്ഞത്തുകിൽ ചുറ്റി നിൽക്കുന്ന കണ്ണനെ 

ഉൾക്കണ്ണിലെന്നും കണി കണ്ടുണരുവാൻ 

ഭാഗ്യമേകീടുന്ന പൊന്നിൻ വിഷുക്കണി 

കണ്ടിന്നുണരുവാൻ കണ്ണേ തുണയ്ക്കണം!

മണ്ണിൽ കുളിർമണിത്തുള്ളികളായ് മഴ-

വന്നെത്തുവാൻ മനം വെമ്പുന്ന വേനലിൽ 

പൊന്നുരുകും പവൻ മിന്നും കുലകൾ മെയ് 

മൂടിയെങ്ങും കർണ്ണികാരം ഒരുങ്ങവേ  

പീതാംബരം ചുറ്റി നിൽക്കുന്ന ഭൂമിയും 

മഞ്ഞത്തുകിൽ ചാർത്തിടും മേഘവർണ്ണനും  

ഒന്നിച്ചു നൃത്തമാടും വിഷുക്കാലമീ 

മണ്ണിനും വിണ്ണിനുമേകുന്നു പൊൻകണി! 

എങ്ങോ വിളഞ്ഞൊരു നെന്മണിയീ വിഷു-

സദ്യയ്‌ക്കമൃതായ്  വിളമ്പുന്ന വേളയിൽ 

നാടിനാകെയന്നമൂട്ടുവാൻ മണ്ണിതിൽ 

വേലയെടുക്കുവോർക്കൊക്കെയും വന്ദനം! 

വിത്തു വിതച്ചു വർഷം  വരാൻ  കാത്തിടും 

കർഷകർക്കൊക്കെയും  നേരുന്നു നന്മകൾ!  

നിങ്ങൾക്കു പൊൻവിളക്കിൻ മുന്നിൽ നാക്കില- 

യിട്ടു വിളമ്പുന്നുവെൻ വിഷുസദ്യ ഞാൻ...