വലയ്ക്കല്ലേ ഭഗവാനേ
വരുന്നുണ്ടു വ്രജഭൂവിൽ,
വനമാലീ വരുമോ നീ
വഴികാട്ടുവാൻ?
അവിടേയ്ക്കു പുറപ്പെട്ടു
മനമാകെ വനികയായ്,
ഇനി നിൻ്റെ നടനമേ-
യെനിയ്ക്കു വേണ്ടൂ!
ഭഗവാൻ്റെ മുളവേണു
പൊഴിയ്ക്കുന്നൊരമൃതമെൻ
ഹൃദയത്തെപ്പളുങ്കാക്കി-
ത്തിളക്കിടേണം.
കദംബത്തിന്നിതളുകൾ *
പൊഴിഞ്ഞൊരാ വഴിനീളെ -
യകിലിൻ്റെ സുഗന്ധമാ-
യൊഴുകീടേണം.
നടക്കുമ്പോഴിരിക്കുമ്പോ-
ഴുറങ്ങുമ്പോഴൊരുമാത്ര
വിടാതെന്നെയെടുത്തു നി-
ന്നകത്താക്കണം!
അനന്തകോടികളായ് നീ
പ്രതിഫലിച്ചുലകാം
ഗോപികകളെ നയിക്കും
ശ്രീനാഥനാകേണം.
നിറുകിൽ നിന്നൊരു ചെറു-
മയിൽ‌പ്പീലി പൊഴിഞ്ഞതു-
മവിടുത്തെ വഴികളിൽ
കിടപ്പതുണ്ടാം!
ഹരിചന്ദനവും ഗോരോ-
ചനവും നിൻ കുറിയിൽ നി-
ന്നടർന്നെങ്ങാൻ പൊടിമണ്ണിൽ-
ക്കലർന്നിട്ടുണ്ടാം!
ഉറിയേറി നവനീത-
മെടുത്തപ്പോഴുടഞ്ഞതാം
കുടത്തിൻ്റെ പൊട്ടുക-
ളങ്കണത്തിലുണ്ടാം!
കുടപോലെഎടുത്തു നീ-
യുയർത്തിയൊരചലത്തി-
ന്നടിയിൽ നീ തളിർപ്പിച്ച
തുളസിയുണ്ടാം!
വഴിനീളെയലഞ്ഞു നീ
തെളിച്ചൊരാ ഗോക്കളുടെ
കുളമ്പടിക്കിടയിൽ നിൻ
പദങ്ങളുണ്ടാം!
അതിലെല്ലാം വിരൽ തൊട്ടെൻ
മിഴിയിൽ വച്ചിടുമ്പോൾ നിൻ
തിരുസാമീപ്യവുമനു-
ഭവിയ്ക്കവേണം!
ഹരേ കൃഷ്ണ! ഹരേ കൃഷ്ണ!
ഹരേ കൃഷ്ണ! ഹരേ കൃഷ്ണ!
ഹരേ കൃഷ്ണ! ഹരേ രാധാ-
രമണാ കൃഷ്ണ!
ഹരേ ഗോപാലക കൃഷ്ണ!
ഹരേ വൃന്ദാവനകൃഷ്ണ!
ഹരേ വ്രജകുലനാഥ!
ശരണം കൃഷ്ണ!
*കദംബപ്പൂക്കളുടെ ഇതളുകൾ
No comments:
Post a Comment