നവീ(ശീ)കരണം

ആത്തണലില്ലിനിമേലിലാക്കാവിലെ
കാടു പോയ്, വേവുന്ന ചൂടാണു ഭാവിയിൽ. 
കാടടച്ചുദ്ധരിച്ചാട്ടിക്കളഞ്ഞോരു
കാവിതിൽ നാഗങ്ങൾ കല്ലായിരിക്കുന്നു!
വെട്ടിനിരത്തിപ്പുതുക്കീ ശതകങ്ങ -
ളൂഴിയിലാഴ്ന്നു വേരോടിയ പൈതൃകം.
നൂറ്റാണ്ടുകൾ കണ്ട കാവിതിൽക്കാവലാ-
യിക്കണ്ടകാലം വസിച്ച ചരങ്ങളോ
കാടും കരിയിലച്ചപ്പും തിരഞ്ഞല -
ഞ്ഞെങ്ങോയിഴഞ്ഞുപോയാർക്കുമറിവീല
നാഗബിംബാരാധനയ്ക്കായണഞ്ഞവർ
വാഴ്ത്തുന്നു ജീവൻ നിലച്ചോരു കാവിനെ...
"കാടുപോയപ്പോൾ തെളിച്ചമായ് കാവിതിൽ
വന്നുപോകാനുമെളുപ്പമായ്, മെച്ചമായ് ,
പാമ്പു വരില്ലിനി, നിർഭയം ചെയ്തിടാം
നാഗപ്രീതിക്കായി പൂജാദികർമ്മങ്ങൾ !
കാവിൻ പുന:പ്രതിഷ്ഠോൽസവം കേമമായ് !
കാടിന്നടിയന്തരമഹോ കേമമായ് !
നിത്യം തൊഴാനിനി ചിത്രമായ് തൂക്കിടാം
ചിത്രോടക്കല്ലേയനുഗ്രഹിച്ചീടുക!
ചിത്രോടക്കല്ലേയനുഗ്രഹിച്ചീടുക!"

Before

 

After