ആവണിഅവിട്ടം

വേദപഠനയജ്ഞത്തിലേർപ്പെട്ടിരിക്കുന്ന വേദാർത്ഥികൾക്കേവർക്കും

ആവണിഅവിട്ടനാൾ  ആശംസകൾ... 

വേദമന്ത്രോപാസനാർത്ഥമുണരുമീ 

ശ്രാവണമാസനിലാവിൽക്കുളിച്ചിടാം,  

പൂർവ്വസൂനുക്കളാമാചാര്യരെ സ്മരി-

ച്ചാചാരപൂർവ്വമറിവിനെക്കൈതൊഴാം! 

ഇന്നീയവിട്ടവിളക്കാൽത്തെളിയട്ടെ 

വേദവെളിച്ചമീ വിശ്വം മുഴുവനും!  

മന്ത്രദ്രഷ്ടാക്കളാം മാമുനിവൃന്ദങ്ങ-

ളീശ്വരസത്യമുൾകണ്ണാലറിഞ്ഞവർ, 

വേദവേദാംഗപാരംഗതർ, വാമൊഴി-

യാലെയറിവു പകർന്നു പൊയ്‌പ്പോയവ-

രേവരെയും മനസ്സാലെ നമിച്ചുകൊ-

ണ്ടിന്നു വേദാഭ്യാസയജ്‌ഞം തുടങ്ങിടാം. 

വേദവേദാന്തപുരാണേതിഹാസങ്ങ-

ളന്തമില്ലാതോളമുള്ള മഹാർണ്ണവ-

ത്തിങ്കൽ നിന്നിറ്റു നുകരുവാനാശയോ-

ടേറ്റമുഴറുമർത്ഥിയ്ക്കു മുന്നിൽ ദൃഢ-   

മെത്തും യദൃച്ഛയാ ജ്ഞാനിയാം സദ്ഗുരു!

ഇന്നീയവിട്ടവിളക്കാൽത്തെളിയട്ടെ 

വേദവെളിച്ചമീ വിശ്വം മുഴുവനും!